O PSdeG leva ao Constitucional o copago nos comedores escolares

O PSdeG levará ao Tribunal Constitucional o novo sistema que amplía o copago nos comedores escolaresde Galicia e instaurado pola Xunta de Galicia. Así o anunciou o seu secretario xeral, Pachi Vázquez, durante unha sesión de control Parlamento outra vez moi tensa e na que Núñez Feijóo defendeu unha medida da que se declarou "orgulloso".

Feijóo declárase "orgulloso" do sistema de copago e advirte de que "non se pagará o comedor aos fillos dos deputados"

O presidente do Goberno galego amosouse desafiante e volveu atacar a oposición. "Comprendo que igual aos seus fillos e aos seus netos  habería que pagarlles o comedores, pero non o imos facer", chegou a dicir Feijóo, que destacou que "os mileuristas non pagarán o comedor" e que "un 67% das familias galegas tampouco, mentres que o 10% achegará un euro". O socialista Pachi Vázquez, no entanto, retrucou para lembrar que si pagarán os que "cobran 583 euros ao mes" para pouco despois confirmar que levarán o sistema ao Constitucional.

Pachi Vázquez cre que a medida é contraria á Constitución e á lei de educación

"Con que obriguen aos nenos do rural a non poder comer atoparanse enfronte co PSOE", insistiu Vázquez nunha sesión de control na que Núñez Feijóo censurou as acusacións do secretario xeral socialista, que cualificou de "barbaridades". Segundo o presidente da Xunta, a ampliación do copagao só afectará "aos que máis teñen".

Para Pachi Vázquez, a medida "vai en contra" da Constitución e da lei de educación, que determina que as administracións deben sufragar os servizos de comedor e transporte aos alumnos que se desprazan fóra da súa localidade.

O BNG entrega un tupper ao conselleiro en protesta polo copago

Por outra banda, a deputada do BNG, Carme Adán criticou  o “dobre raseiro” do PP á hora de practicar recortes no ensino público galego mentres apoia con fundos públicos centros que segregan ao alumnado.

A nacionalista aproveitou o debate dunha proposición non de lei, debatida o martes a última hora da tarde, na que reclamaba “ a anular” os concertos educativos cos centros que segregan ao alumnado segundo o sexo, para agasallar  un tupper, cunha mandarina e un kiwi, ao titular de educación en protesta polo “copago” nos comedores escolares anunciado o pasado 12 de marzo en  sesión plenaria polo propio Jesús Vázquez.

Adán asegurou que esta medida afectará a un gran número de familias galegas que deberán pagar un servizo que o BNG considera necesario para garantir un dereito fundamental como é o Dereito á Educación. Para a deputada, o copago nos comedores escolares incidirá de maneira decisiva no deterioro do ensino público ao que xa hai  que sumar, dixo,  sucesivos recortes do PP nos últimos anos.

A parlamentaria pediu a “devolución da axuda pública” aos centros sexistas que, na súa opinión, deberían pechar por “non educar en igualdade”.

Adán reclamou a devolución dos tres millóns de euros “ilegais” destinados a estes  centros de ensino e aludiu á recente sentenza do Tribunal Superior de Xustiza de Galiza que anula os convenios cos centros educativos que segregan ao alumnado por razón de sexo.

A Xunta acatará a sentenza que anula os concertos cos centros que segregan por sexo

A Xunta non recorrerá a sentenza do Tribunal Superior de Xustiza de Galicia (TSXG) que anula os concertos cos centros educativos que segregan por sexo. Así o anunciou este mércores o conselleiro de Educación, Jesús Vázquez, que contestou ás preguntas da oposición asegurando que o Goberno "acatará" o ditame, polo que deixará de subvencionar os colexios que separan segundo o xénero.

Os 3 millóns de euros destinados a estes concertos equivalen a 650.000 menús escolares

Os cálculos dos sindicatos educativos e dos grupos da oposición coinciden en que, atendendo aos orzamentos autonómicos e á orde de concertos de 2009, as achegas de fondos públicos aos colexios que separan os nenos das nenas viñeron supoñendo uns 3 millóns de euros anuais. Así, BNG e AGE reclaman xa que estes cartos -que equivalerían a 650.000 menús escolares- sexan destinados á mellora da educacióno pública e, máis concretamente, a este servizo sobre o que agora a Xunta ampliou o copago.

A Consellería de Educación anunciou hai tan só unhas semanas a suba de ata un 40% nas taxas dos comedores escolares e fixou un prezo máximo de 4,50 euros por estudante e día, o cal ten que ser abonado polo alumnado en cuxas familias os ingresos per cápita sexan superiores a 9.000 euros anuais.

"Que se destinen os cartos a financiar os comedores escolares", reclama AGE

Alternativa Galega de Esquerda esixe que eses 3 millóns de euros "se destinen a mellorar o sistema educativo público financiando por exemplo os comedores escolares" para que "non sexan as familias as que teñan que pagar porque os seus fillos e fillas coman no colexio". Tamén o BNG e o PSdeG optan porque eses fondos se destinen ao ensino público. De feito, a decisión anunciada da Xunta de non recorrer a sentenza chega un día despois de que o PP rexeitase no Parlamento apoiar unha moción presentada polo Bloque na que se defendía anular  os concertos do Executivo cos centros que segregan o alumnado por razón de sexo.

O IES Daviña Rei de Monforte trasladou ao Parlamento a súa negativa á supresión da Eso e o BAC

Seis autocares con profesorado, alumnado e membros da ANPA trasladaron a protesta ás portas do Hórreo para denunciaren o desmantelamento de centros educativos por parte da Xunta.
“Enterámonos que querían suprimir a ESO e o Bacharelato do Instituto sen previo aviso”. Cristina González, da ANPA do IES Daviña Rei de Monforte chegou diante do Parlamento galego nun dos seis autocares que trasladaron a protesta desde as terras de Lemos até a capital. “A nosa reacción inicial foi a de ter que pedir explicacións e protestar, non consideramos que sexa unha idea acertada”. O seu centro é un referente na zona pola súa aposta polas novas tecnoloxías e formar parte de varios proxectos da UE.
“Somos o primeiro centro en alumnado de Monforte”, sinala  Isaac González, o seu director, “ loitamos desde hai anos por iniciativas adaptadas aos novos tempos”. A decisión da Consellaría de Educación que dirixe o polémico Xesús Vázquez podería esfarelar anos de traballo e inversións nun centro que conta con 500 alumn@s e 55 profesor@s. “Aínda non temos confirmación oficial”, afirma o director, “se hai confirmación a perda de calidade do ensino sería evidente ao trasladar ao alumnado a outros centros e crear grupos máis grandes”
Pais e nais sen liberdade de elección
Unha das preocupación do director é a falta de liberdade de elección de centro que terán nais e pais se eliminan a ESO e o BAC. “Eles elixiron vir con liberdade ao IES Daviña Rei”, asegura, “elixiron este centro por ser aberto e apostar polas novas tecnoloxías e agora, de boas a primeiras, deixaríanos cos alumnos de FP e a metade do profesorado, cousa que ninguén quere”.
Outro caso semellante ao de Monforte é o do IES As Mercedes de Lugo. Neste centro de 600 alumnos, tamén teñen previsto mobilizacións contra a eliminación da ESO e o BAC. “Queremos solidarizarnos tamén eles e con outros como o IES Carballeira en Ourense ou os de Sarria, Vilalba e Chantada”. A ANPA agardaba ser recibida polas diferentes formacións políticas representadas no Parlamento para presentarlles a súa queixa. Deputad@s de BNG e AGE achegáronse a primeira hora ao lugar da protesta para interesarse pola súa reivindicación.

O PP ve na educación sexista e ultrarrelixiosa "unha modalidade educativa de absoluta liberdade"

Defende o financiamento con diñeiro público dos colexios segregacionista e di que non existe ningunha discriminación "porque os nenos non xogan a cuberto namentres as nenas se mollan no patio". Faino durante o debate dunha moción do BNG para anular os concertos polos que cinco centros reciben 3 millóns de euros cada ano, apoiada por AGE e PSOE.
"Unha modalidade educativa de absoluta liberdade de elección para os pais e que nin discrimina nin segrega". Así definiu o deputado do PP Román Rodríguez a oferta de ensino concertado que realizan cinco centros galegos que separan o alumnado en función, en palabras da parlamentar do BNG Carme Adán, "dunha adscrición física, o sexo, e dunha construción social, o xénero".
Onde as tres formacións políticas da oposición que teñen representación na Cámara galega ven educación sexista o PP mete con calzador a "liberdade de escolla" e, obviando que o que se está a debater é o financiamento con 12 millóns de euros en catro anos deses cinco colexios vinculados ao Opus Dei, Román Rodríguez subliña que "ninguén obriga a ningunha familia a mandar os nenos a un centro deste tipo". Ao seu entender, non existe ningún tipo de discriminación porque "os nenos non fan deporte a cuberto namentres as nenas se mollan no patio" nin existen diferencias "non medios ou no financiamento". 
Actividades extraescolares que perpetúan os roles de xénero
De entrar o deputado Rodríguez no portal web de calquera destes colexios (Monte Castelao, Las Acacias e Aloya en Vigo; e Montespiño e Peñarronda na Coruña), vería que as diferencias quedan á vista con ollar só as actividades extraescolares que uns e outros propoñen, dependendo de se nos seus pupitres sentan mulleres ou homes. Para elas os deportes que se ofertan son baloncesto, patinaxe, aerobic, ximnasia rítmica e un obradoiro de costura ofertado como 'La aguja mágica'.
Porén, eles poderán practicar judo, tenis, esgrima e fútbol-sala. Outras imaxes mostran unha moza durante unha sesión "orientada a desenvolver a psicomotricidade en bebés" ou nenas vestidas cun mandilón rosa poñendo unhas plantas no que semella un invernadoiro. En definitiva, actividades extraescolares definidas en función dos roles de xénero.

Con todo, Román Rodríguez limitouse a repetir o argumento que en agosto de 2012 esgrimiu o conselleiro de Educación, Jesús Vázquez, após coñecer a sentenza do Tribunal Supremo que invalida os concertos con colexios segregacionistas en Andalucía e Cantabria. "Eu creo na liberdade de elección por parte das familias e creo nun réxime democrático onde as familias participen nos modelos educativos dos seus fillos", dixo Vázquez. Seis sentenzas do TSXG botaron abaixo a súa teima de consultar ás familias a lingua en que se educan as crianzas; outra máis anulou os concertos cos cinco centros.

O PP renovou uns concertos anulados en 2009
Ao fío, a deputada do BNG Carme Adán repasou a lexislación vixente que fica vulnerada cada vez que se financian estes colexios con diñeiro público, recalcando que tal práctica "podería chamarse segregación ou podería chamarse privar a nenas e nenos do dereito á igualdade". Desde o artigo 84 da LOE "que sinala que non pode existir ningunha discriminación" ao decreto 30/2007, de 15 de marzo, de admisión do alumnado, "onde se recolle que non se poden subvencionar con fondos públicos os colexios que segregan". 
Adán acusou o PP de resucitar tan pronto puxo o pé na Xunta estes concertos, que foran anulados en 2009 (renóvanse cada catro anos e os últimos foran asinados por Fraga en 2005). Jesús Vázquez remexíase no seu escano e negaba coa cabeza os datos da nacionalista. ​
Após recordarlle que o financiamento dos centros que practican unha educación sexista "é ilegal", Adán quitou unha fiambreira cun kiwi e unha laranxa "da miña casa" e entregoullo a Vázquez no seu escano.
"Unha castidade aberrante"

Desde as bancadas de AGE, o deputado Ramón Vázquez Díaz comparou o financiamento da educación sexista coa propia dun reximen fascista e espetoulle ao conselleiro que "ou pouco avanzamos ou pouco retrocedemos". Acusou o PP de "insistir" desde a Xunta en subvencionar estes colexios "estabelecendo ao mesmo tempo o repagamento dos comedores como medida de graza para as clases populares".
Vázquez Díaz rexeitou o argumento da "liberdade de escolla" repetido pol@s conservador@s enfatizando que "ningunha liberdade de elección pode amparar unha discriminación". Contrarrestou a falta de razóns do PP subliñando que "non existe ningún estudo serio que corrobore que separar alumnado por sexo mellore o seu rendemento" e, após recalcar que tamén se separa o profesorado (profesoras para as mulleres e profesores para os homes), cualificou este modelo de ensino como "dunha castidade aberrante".

O PSOE convida a Jesús Vázquez a tapar cos 3 millóns "as fendas do ensino público"

Ao fío, o voceiro do PSOE Ricardo Docasar mostrou o apoio do seu grupo parlamentar á moción do BNG que pediu a supresión dos concertos sinalando que eses tres millóns anuais "virían moi ben para as fendas do ensino público", e citou o repagamento nos comedores escolares, a redución das bolsas e das contías ou a tesourada de até o 73% nos gastos de financiamento dos centros de Secundaria.
​Dixo Docasar que "segregar é tamén permitir que uns alumnos coman quente e outros nun tupper, non facer nada cando o estudantado non pode pagar os libros, que teñan que abandonar estudos porque lles pagan tarde a bolsa ou ser cómplice de que a mocidade teña que facer as maletas".
Após ouvir a intervención do deputado do PP, que atribuíu o rexeitamento da oposición a "un complexo colectivo", Carme Adán pechou o debate cuestionando a Román Rodríguez sobre a liberdade que defende o seu partido: "Que as mulleres poidan abortar na rede sanitaria pública e o seu partido llelo impida, por exemplo?", cuestionou a nacionalista.
Centrándose na moción que defendeu, recordoulle a Rodríguez que "non se lles está a pedir que pechen os cinco centros, que eu sería partidaria de que así fose, senón que non se financien con diñeiro público". Namentres a nacionalista interviña, Román Rodríguez ría desde o seu escano os comentarios da tamén deputada conservadora Paula Prado.

NOTA: as imaxes que acompañan esta información foron tiradas das páxinas web de tres centros segregacionistas

Mesa redonda LOMCE

A Vicepresidencia de Poio para FANPA-PONTEVEDRA ten o pracer de convidalos/as á:
MESA REDONDA SOBRE A LOMCE
O venres día 12 de abril do 2013 ás 20.00 h no CASAL DE FERREIRÓS (POIO)


PARTICIPARÁN:
Moderadora
Dona Purificación González - Xornalista da Canle Rías Baixas, Arousa Radio.

Convidados

Dona Marga Blanco - Sindicato de CCOO, experta sobre a LOMCE – Lei Wert.
Don Alberto Fernández - Portavoz do Sindicato de Estudantes de Vigo.
Dona Luisa Márquez - Mestra do IES Luis Seoane, Coordinadora Galega da UNESCO.
Dona Alicia Martínez - Concelleira de Educación no Concello de Poio.
Don Guillermo Meijón - Deputado do PSOE no Congreso dos Deputados, licenciado en Pedagoxía.
Don Alberto Pita - Presidente de FANPA Pontevedra.

NOTA IMPORTANTE: todas as persoas interesadas en asistir fóra do Concello de Poio, deberá confirmar asistencia no correo info@nontedurmas.org, poñendo no asunto asistencia charla lomce.

O pleno de Vigo rexeita os "recortes" en comedores escolares

O pleno da Corporación Municipal de Vigo aprobou este luns unha moción na que rexeita os "recortes" nos comedores escolares e reclama a Xunta que retire o novo copagamento e manteña os fondos que viña destinando.

O texto, unha iniciativa socialista que saíu adiante cos votos dos grupos municipais do PSOE e do BNG e contou coa oposición do PP, pide un "rexeitamento contundente dos recortes" e esixe a Consellería de Educación e o propio presidente da Xunta, Alberto Núñez Feijóo, o "mantemento dos fondos destinados a comedores".
A iniciativa denuncia que a Xunta xa recortou o pasado ano as achegas a comedores escolares e que foi o Concello de Vigo o que asumiu esas cantidades, ao tempo que engade que, agora, o Executivo autonómico presentou unha reforma do sistema de copagamento que "incrementará un 40 por cento o prezo medio do comedor" e "levará consigo que 20.000 nenos que hoxe comen gratis pasen, dende o próximo curso a ter que pagalo, afectado 3.000 escolares vigueses".
Ademais, os concelleiros nacionalistas levaron á sesión plenaria varias friameiras de plástico para solidarizarse cos escolares que deberán pagar máis por este servizo.
Por outra parte, socialistas e nacionalistas aprobaron unha moción --presentada polo PSOE-- na que solicitan á Xunta que "deixe de penalizar á área sanitaria de Vigo" e que "Pontevedra e o Salnés "volvan ter como referencia para cirurxía cardíaca" a unidade do Hospital do Meixoeiro.
Ademais, na sesión deste luns, a ordinaria correspondente ao mes de marzo, os tres grupos políticos aprobaron por unanimidade a elaboración dunha estratexia de promoción turística da urbe, unha iniciativa presentada polo grupo popular.

MEDALLA

O pleno ordinario estivo precedido da celebración dunha sesión extraordinaria na que se aprobou a entrega da Medalla de Vigo á Xunta Local da Asociación Española contra o Cancro e a concesión do título de Vigueses Distinguidos a Carlos Oroza, Antonio Romero Lorenzo, Gumersindo Espiña Campos, o colexio Compañía de María, Antón Piñeiro Lorenzo, a Federación Veciñal e a Sociedade Deportiva Atlántida de Matamá.
A gala de entrega de galardóns celebrarase o mércores no Centro Cultural Novacaixagalicia.

Profesorado do CELGA: “Traballamos sen contrato nin Seguridade Social para a Xunta”

A Asemblea de Profesorado do CELGA denuncia a súa precaria situación e exixe a profesionalización.
Traballar sen contrato, sen seguro e sen actualización salarial tamén é unha situación que pode acontecer na administración pública. Pasa na Xunta de Galiza co colectivo de traballadoras e traballadores da lingua que imparten aulas do CELGA, arredor de 500 persoas no caso de profesorado colaborador, e 124 no caso de profesorado habilitado. “Nin formalizamos contrato, nin temos un seguro, e a maior parte de nós temos que coller o coche para ir ao traballo posto que non están nas cidades que vivimos e arriscámonos a ter un accidente e non ter seguro”, din.
Cóntanos a súa experiencia como profesor de lingua galega Anxo Otero, membro da Asemblea de Profesorado do CELGA. “A problemática non é nova, xa acontecía antes de se implantar o CELGA hai máis de vinte anos”. As irregularidades denunciadas por este colectivo non rematan aí. “Os cursos son bastante opacos”, asegura este profesor, “hai ademais listaxes de avaliadores dos cursos Celga que chaman a dedo a quen queren e despois corrixen os exames e os reparten como queren e a quen queren, non hai uns criterios”. Mesmo hai outros cursos como os de linguaxes específicas, como son os de Linguaxe Administrativa e Linguaxe Xurídica que non teñen unha listaxe pública.

Para traballar nun destes cursos, cunha duración de 70 horas, hai que levar sete meses no desemprego

Sete meses no desemprego
O sistema que emprega a Xunta para contratar este profesorado é o de listaxes. Para entrar nelas, alén de contar coa titulación exixida, hai que cumprir cun curioso requisito: estar desempregad@. “Para acceder a este traballo hai que estar no paro e presentar a documentación até o 30 de outubro”, explica Anxo Otero, “unha vez entregue, poden reiterar a petición en xaneiro ou febreiro e antes de comezar os cursos, no mes de abril, tes que estar aínda no paro”. Ou sexa, para traballar nun destes cursos, cunha duración de 70 horas, hai que levar sete meses no desemprego. Mais a historia é aínda máis revirada. “A xente que cobra a prestación por desemprego ten de a suspender durante os dous meses do curso e non cobras nada, posto que o curso se paga en setembro.”

A CTNL tamén denunciou nun documento a precaria situación do profesorado do CELGA

Proposta da CTNL
A Coordinadora de Traballadores/as de Normalización da Lingua (CTNL) presentou en xullo de 2010 un documento a partir dun  proceso de reflexión e análise dun amplo grupo de persoas con experiencia en distintos ámbitos relacionados cos CELGA. A proposta, feita súa pola actual  Asemblea de Profesorado do CELGA, reclamaba “a creación dun equipo docente estábel e profesionalizado, seleccionado e contratado a través dun proceso selectivo público de acordo cos principios de igualdade, mérito, capacidade e publicidade”.
O texto denominado Proposta para a mellora da planificación e xestión dos Celga asinalaba no apartado docente a necesidade de corrixir a “grave situación irregular e que durante os cursos o profesorado estea formalmente contratado, coa correspondente cotización e alta na Seguridade Social, e coas condicións e dereitos lóxicos e básicos de calquera traballadora”.
Negociación
“Presentámoslle a nosa proposta ao secretario Xeral de Política Lingüística en setembro”, asegura Anxo, “e sacaron unha resolución en xaneiro que non conta con ningunha ideas que lle transmitimos”. Este membro da Asemblea de Profesorado do CELGA é contundente e salienta aínda que “demos por superado o diálogo con Política Lingüistica”.
Agora quédalles a negociación cos partidos políticos con representación no Parlamento galego como medida de presión para solucionar o seu problema. A súa reclamación é ben sinxela. “Nós reclamamos a profesionalización, que haxa un concurso público e transparente para todo o mundo.”

Google aposta por voar tamén en galego

Google estrea en Europa o seu servizo de buscas de voos. Despois de dous anos de funcionamento en Estados Unidos, o xigante estadounidense introduce agora Google Flight Search en España, Reino Unido, Francia, Italia e os Países Baixos.
O servizo de buscas ofrécese en oito idiomas, incluídas as catro linguas oficiais no Estado español, ademais de inglés, italiano, francés e holandés. Tamén existe unha páxina de 'Axuda' en galego.
Para utilizar o servizo en galego hai que configurar a conta persoal de usuario de Google seleccionando o galego como idioma principal.
Deste xeito, Google recoñece a importancia do galego, éuscaro e catalán, e atende á realidade da pluralidade lingüística do Estado español.
O servizo
O buscador de Google permite atopar voos con saídas nestes cinco países europeos a calquera destino do mundo, ademais de visualizar os prezos en tempo real.
O servizo é unha fonte de información e non permite, polo de agora, facer reservas diretamente dende Google, inda que a páxina realiza un envío automático ao sitio web da aeroliña elixida para poder realizar a reserva. Ademais, ofrécelle ao usuario destinos personalizados.
Información tirada de Galicia Confidencial.

Novas de lingua

Semana do 15 ao 21 de marzo de 2013 Se non visualiza correctamente este boletín, prema aquí.

www.observatoriodalinguagalega.org

Español
O 45 % dos libros editados en Galicia no ano 2012 estaba en galego O Instituto Nacional de Estatística (INE) publicou unha radiografía do sector editorial do Estado español. Segundo estes datos, en Galicia editáronse en 2012 un total de 2660 libros (o 45 % deles en lingua galega).		AXENDA 21 de marzo First Symposium on Sign Language Acquisition. Lisboa (Portugal) 21 de marzo Rosalia de Castro no século XXI. Santiago de Compostela 23 de marzo XVIII Jornada de Sociolingüística d'Alcoi 2013. Alcoi 01 de abril International Conference on Terminology and Multilingual Structured Content for Industry and Trade. Medellín (Colombia) DE INTERESE
GALICIA
Google ofrece en galego o seu servizo de buscas de voos Google Flight Search   Cultura e Educación apoia 'Vive a paixón', que impulsará o uso do galego na celebración da Semana Santa compostelá   Unha sentenza en Pontevedra declara ilegais os sinais de tráfico en galego   Valentín García acompaña a Manuel González no seu acto de nomeamento como fillo predilecto do concello de Mazaricos   O BNG de Ferrol pide que todos os edís se expresen en galego   Os equipos de normalización piden que se garanta unha "competencia plena" en galego ao acabar a ESO   A Xunta asume as sentenzas sobre o Decreto que avalan o equilibrio lingüístico e plurilingüismo, conforme á Lei de normalización   Cultura e Educación presenta en Pontevedra un novo volume dos Cadernos Ramón Piñeiro   O Concello de Santiago de Compostela promove cun novo concurso o uso do galego na publicidade comercial   Ponse en marcha en Pontevedra unha nova edición do programa de fomento do galego "Ben veñas, maio"   O Concello do Grove promove un curso de galego para cidadáns estranxeiros
ESPAÑA
CATALUÑA   O catalán deixa de ser a lingua preferente nas deputacións de Lleida e Xirona   O Barça impulsa unha guía lingüística para fomentar o catalán no deporte   Organizan o primeiro curso de lingua de signos catalá para as persoas xordas por internet   Nace Aplica’t, unha nova aplicación de lingua catalá PAÍS VASCO   Crean unha nova ferramenta para o ensino do éuscaro na Formación Profesional   Biscaia aproba unha proposta para garantir o uso do éuscaro   Reivindican o éuscaro como medio para a convivencia ----------------   Andalucía forma a policías locais en lingua de signos   Aumentan os graos en inglés nas universidades privadas valencianas
MUNDO
Os cidadáns do Condado irlandés de Galway presentan máis de 100 queixas por non poder acceder a servizos públicos en gaélico   Máis de 1000 mozas e mozos asinan unha iniciativa para viviren en galés   Afganistán quere protexer as súas linguas nativas   Un programa piloto introduce o ensino do hebreo en escolas de Gaza   Un deputado bretón lamenta o fracaso na aprobación da Carta Europea das Linguas Rexionais ou Minoritarias en Francia   Un proxecto cultural ofrecerá teatro en lingua sarda para o alumnado da escola media de Sardeña   O Brasil precisa que a xente nova fale máis dun idioma   O 21 % das escolas públicas do Perú ofrece un servizo de educación bilingüe   O portugués volve falarse no Parlamento de Timor Leste   O catalán é a lingua máis habitual entre a poboación escolar de Andorra

SELECCIONAMOS... » Termos esenciais da arquitectura de computadores galego-español-inglés » IX Premio a artigos xornalísticos normalizadores » IV Premio Rosalía de Castro de normalización lingüística Secretaría Xeral de Política Lingüística. Xunta de Galicia. http://www.xunta.es/linguagalega Teléfono: (0034) 981 54 54 57 | Rúa Pastoriza, 8 15781 Santiago de Compostela
En cumprimento co disposto na Lei orgánica 15/1999, de protección de datos de carácter persoal e a Lei 34/2002, de servizos da sociedade da información e comercio electrónico nos artigos 21 e 22, se non desexa recibir máis boletíns envíe unha mensaxe de correo electrónico con asunto "BAIXA DO BOLETÍN" ao seguinte enderezo: boletin@observatoriodalinguagalega.org

--

Confidencialidade: O contido desta comunicación, así como o de toda a documentación anexa, é confidencial e vai dirixido só á persoa destinataria. Se vostede non é o destinatario ou destinataria, solicitamoslle que nolo indique e que non comunique o seu contido a terceiras persoas, procedendo á súa destrución.

Consonte a Lei orgánica 15/1999, do 13 de decembro, de protección de datos de carácter personal, informámolo/a de que os seus datos persoais están incluídos nun ficheiro do que é responsable a Federación Provincial de ANPAS de Pontevedra, inscrito no Rexistro da Axencia Española de Protección de Datos, do que é responsable, e empréganse para realizar una correcta xestión da relación que nos vincula.

Pode exercitar os dereitos de acceso, rectificación, cancelación e oposición en calquera momento, nun escrito no que deberá achegar unha copia do documento oficial que o/a identifique dirixido á FANPA, Rúa Alfonso XIII, núm. 7, 3º andar (antigo Conservatorio), 36002 Pontevedra.

Federación de ANPA de Pontevedra
Rúa Alfonso XIII, nº 7, 3 andar (Edificio antigo conservatorio)
36002 Pontevedra
Apartado de correos Nº 511 36080 Pontevedra
Teléfono: 986 84 34 12
E-mail: info@nontedurmas.org
http://www.nontedurmas.org

Bruxelas sitúa a España entre os Estados que máis recortaron en educación dende o inicio da crise

España sitúase entre os Estados membros que máis recortaron o seu presuposto en educación dende o ano 2010 debido á crise económica, segundo un estudo publicado este xoves pola Comisión Europea. Bruxelas avisa de que estes axustes dificultan a loita contra o paro xuvenil e a reactivación a longo prazo da economía.

Entre 2010 e 2012, o presuposto en educación reduciuse máis dun 5% en Grecia, Hungría, Italia, Lituania e Portugal. En España a baixada sitúase entre o 1% e o 5%, a un nivel similar ao de Estonia, Polonia e Escocia.
En contraste, Austria, Dinamarca, Luxemburgo, Malta e Suecia incrementaron o seu gasto en educación máis do 1%. Alemaña e Holanda non subministraron datos para realizar o estudo.
"Os presupostos nacionais atravesan un período difícil, pero é necesario un enfoque coherente en materia de investimento público no ensino e a formación porque é aí onde reside a clave do futuro dos nosos mozos e unha reactivación económica sostible a longo prazo", dixo nun comunicado a comisaria de Educación, Androulla Vassiliou.
"Se os Estados membros non invisten de forma abondo en modernizar a educación e as cualifiaciones, nos distanciaremos máis dos nosos competidores internacionais e "teremos máis dificultades para abordar o paro xuvenil", apuntou.
O método utilizado pola maioría de países para reducir o presuposto en educación foi rebaixar o salario dos profesores. Esta medida aplicouse en España, Bulgaria, Croacia, Estonia, Grecia, Hungría, Irlanda, Italia, Letonia, Lituania e Portugal. A masa salarial dos profesores absorbe máis do 70% dos presupostos de educación, segundo Bruxelas.
Os recortes traducíronse ademais nunha redución do equipo de profesores en 10 Estados membros, entre os que, segundo o estudo, non está España. Trátase de Bulgaria, Chipre, Estonia, Francia, Italia, Letonia, Lituania, Portugal, Romanía e Reino Unido. Estas reducións, aclara o estudo, non se deben só á crise senón tamén á redución do número de estudantes.
A maioría dos países non tocaron a axuda do sector público aos estudantes, como as bolsas ou os préstamos, e só España e Reino Unido aumentaron as taxas universitarias. Un total de 8 Estados membros -Alemaña, Austria, Grecia, Irlanda, Letonia, Lituania, Luxemburgo e Portugal- prevén axudas financeiras específicas ás persoas no paro ou pouco cualificadas.

O concurso do Parlamento Europeo 'Euroscola' permite participar en castelán e catalán pero non en galego

A oficina de información do Parlamento Europeo en España organiza un concurso para escolares, Euroscola, que chega xa á súa décimo novena edición e que ten como obxectivo "fomentar a aprendizaxe de linguas europeas, fundamental para conseguir unha Europa unida", segundo se explica nas bases, nas que se engade que "o xogo desenvolverase en tres versións lingüísticas: castelán, catalán e inglés. Os participantes poden optar por concursar en cualquera dos tres idiomas".
Tamén se engade que é "importante e necesario" o feito de "dominar outras linguas europeas por parte dos alumnos participantes, dado que os equipos gañadores que asistan ao Programa Euroscola en Estrasburgo deberán comunicarse cos participantes doutras nacionalidades europeas en inglés ou francés". O xogo está centrado nos "dereitos e beneficios que temos os cidadáns europeos e o que significa a cidadanía activa como posibilidade real de participación na construción europea, na que os mozos teñen un papel fundamental".
A exclusión do galego -xunto co vasco- provocou xa protestas e a creación dun grupo de Facebook no que se convida a enviar unha protesta aos organizadores do concurso a través do enderezo electrónico comunicacion@euro-scola.com. A eurodeputada Ana Miranda xa anunciou que vai enviar unha protesta oficial.

A Xunta converte institutos en centros integrados e masifica máis aulas de Secundaria

"Este instituto, non nolo quitedes" berraban este xoves os rapaces do IES As Mercedes de Lugo durante a protesta. O centro é a última vítima da política de axustes da Consellería de Educación, que vén de decidir -"de forma unilateral", como denuncia o equipo directivo e a anpa- a súa conversión nun centro integrado de Formación Profesional.

Uns 200 alumnos que xa están no instituto deberán buscar outro centro, ao igual que os que ían chegar dos centros integrados de Primaria.

A decisión deixa sen instituto a unha zona do sur da cidade de Lugo en pleno crecemento e provoca que 200 alumnos e uns 30 profesores teñan que buscar sitio noutro centro para o curso que vén. Serán recolocados noutros tres institutos achegados, segundo aclara a Xunta, que ademais deberá afrontar outro problema máis, xa que os rapaces de varios centros de primaria adscritos ao IES As Mercedes tampouco saben agora onde van continuar os estudos. "O problema é dobre", advirte a comunidade educativa.
A decisión foille comunicada ao centro cando xa estaba tomada e sen posibilidade de negociación, o que provocou xa que o equipo directivo dimitise en pleno en desacordo non só coa conversión, senón coas formas levadas a cabo pola Consellería de Educación.

As anpa e CIG-Ensino advirten de máis conversións de institutos en centros de FP nos vindeiros meses.

O caso de Lugo non é o único. Tamén en Ourense o IES A Carballeira pasará a ser un centro de Formación Profesional e desde a Fapacel (federación de anpas da provincia lucense) agardan máis decisións deste tipo nos vindeiros días e que afectarían a institutos de Vilalba, Monforte ou A Mariña. Será unha constante nos vindeiros meses, segundo advirten as asociacións de pais e sindicatos como CIG-Ensino.
Elvira Lombao, presidenta de Fapacel, ve na medida "outro ataque ao ensino público" e "outra forma de beneficiar os centros concertados". "A algún sitio van ter que ir os rapaces e moito nos tememos que lles acaben dando liñas novas aos colexios privados para acoller os rapaces", denuncia. Esa será unha opción. A outra, que os cativos sexan recolocados noutros institutos da zona que, como advirten desde as anpas, "xa están masificados". Outro problema para un ensino público demasiado golpeado.

          "É outro ataque ao ensino público e outra forma de beneficiar os centros concertados", denuncia      a  federación provincial de anpa

A decisión provocará unha maior masificación de centros que xa teñen ratios moi altas.

"Estes cambios vannos levar a unha masificación no resto de IES das cidades, a un aumento considerable nas ratios destes centros con todas as complicacións que esto trae consigo non só para o profesorado, senón tamen para o alumnado", denuncia a Fapacel, ao tempo que as anpas dos centros de Primaria adscritos ao IES As Mercedes xa amosaron o seu rexeitamento frontal á medida.
A CIG-Ensino, pola súa banda, xa anunciou tamén que "non vai permitir que se inicie esta reconversión nin a desaparición de ensinanzas nos cetros públicos". Así, veñen de exixir na Mesa Sectorial "a paralización destas medidas para manter a actual oferta de ensinanzas públicas".

Tarde e noite na reitoría da U-Vigo contra a lei de Wer

Estudantado, profesorado e persoal PAS e PDI péchanse no departamento que dirixe Salustiano Mato para lle deixar claro o seu rexeitamento ao apoio que está a brindar ás medidas impostas desde Madrid. No Consello de goberno da quinta feira aprobarase o despedimento de máis de 200 docentes asociad@s.
 A primeira mobilización das acordadas nunha asembleia aberta realizada esta terza feira nos tres campus que fan parte da U-Vigo (Ourense, Pontevedra e Vigo) arrincou esta cuarta ás catro da tarde.

Ducias de persoas vinculadas ao persoal PAS, PDI e ao estudantado concentráronse primeiro diante da reitoría e pecháronse despois co gallo do Consello de goberno convocado para mañá en que se aprobará, entre outras medidas, o despedimento de máis de 200 docentes asociad@s.
Un deses profesores é Luís Fernández, quen sinala que a medida é "un dano colateral" no ataque emprendido en contra do ensino universitario público. Ao lles incrementaren as horas docentes ao profesorado titular, que terán que impartir até cinco ou seis materias, o que se consegue é "unha merma da calidade", "a sobrecarga destes docentes" e "a desaparición dos asociados".
Con todo, o obxectivo das protestas vai máis aló. A comunidade universitaria quere deixar claro ao reitor, Salustiano Mato, que "estamos radicalmente en contra do proxecto Wert, imposto desde Madrid, e do apoio que se lle está a brindar desde a U-Vigo". Subliña Brais Fortes, responsábel de campus dos Comités, que profesorado, estudantado e persoal PAS e PDI "coinciden" en que as medidas que se están a tomar desde o departamento que dirixe Mato traen da man a masificación das aulas, a precariedade laboral e a perda de calidade docente e investigadora. En consecuencia, "empeoran a calidade da Universidade pública".
Após dúas horas de encerro, Ángel Rodríguez di que a valoración é "moi positiva" por ser a materialización dunha decisión que partilla toda a comunidade educativa. Explica o docente PDI que na asembleia da terza feira foron adoptadas "distintas medidas dependendo da singularidade de cada campus", acrecentando que en Pontevedra e Ourense se faran senllas manifestacións diante da vicerreitoría namentres en Vigo se optou polo encerro. Será a primeira dunha campaña de mobilizacións que se completará con outras accións como asembleias e aulas na rúa que se farán nas tres cidades.

O modelo do PP con ensino e a ciudadanía e facilitar o negocio privado dos amigos

A portavoz de educación do BNG, denunciou “o avance” de recortes no ensino público entre os que salientou o “repago” dos comedores escolares e a redución de medios materiais e humanos

O portavoz de educación do BNG, Cosme Pombo volveu denunciar hoxe, trala comparecencia do director xeral de Educación e Cultura en comisión parlamentaria, que o Partido popular avoga “por un modelo de compromiso co negocio no ensino privado e concertado e o deterioro constante do ensino público”. Na súa intervención, Pombo considerou que a comparecencia do responsable da Xunta debería ter como obxectivo “a defensa do ensino público” sen embargo, dixo, unha vez máis constatamos que os orzamentos do 2013 ao igual que o pasado ano “reflicten máis recortes e deterioro do ensino público en Galiza. O PP avoga por un sistema educativo neoliberal O nacionalista, indicou que o modelo educativo do Partido popular é “ neoliberal, elitista e clasista”. Neste sentido, manifestou que “o PP liquidou todos os avances conseguidos antes do 2009” como a gratuidade dos libros de texto, extensión de comedores escolares, impulso á normalización lingüística, ampliación de cadro de persoal e melloras para o profesorado. O parlamentario asegurou que a política educativa galega sostense nos orzamentos, “a redución de 153 millóns de euros no ano 2013 e no 2009 un recorte do 32 por cento e 660 millóns de euros menos” representan “un novo ataque ao ensino público galego”.

O PP emprega fondos públicos en centros que segregan ao alumnado

O PP pecha unidades educativas, engadiu pero apoia con fondos públicos centros que segregan ao alumnado “incumprindo a propia LOE” que establece que non pode existir ningún caso de discriminación ou educación sexista por razón de “raza, sexo, relixión ou opinión”.
O deputado fixo fincapé na sentenza do TSXG contra a segregación do alumnado nos centros de ensino polo que pediu que a Xunta “recupere os tres millóns de euros (cada ano) destinados aos centros concertados e destine esa cantidade á mellora do ensino público”.
Pombo tamén aludiu na súa intervención a unha denuncia contra o recorte para funcionamento en 123 centros de ensino nun 9% e en 21 centros en máis dun 20 por cento.
O parlamentario concluíu afirmando que o “repago” nos comedores escolares suporá a eliminación dun “dereito do ensino” sobre todo no medio rural, onde este servizo faise fundamental para poder estar escolarizado, o PP trala aprobación dos orzamentos volve anunciar novos recortes

A Xunta 'premia' os colexios que máis aforran recortándolles en gastos de funcionamento

A Consellería de Educación castiga o aforro e recorta a partida destinada a gastos de funcionamento dos centros de ensino de Secundaria. En case catro de cada dez institutos, centros de FP e centros públicos integrados de Galicia o axuste supera o 9%, tal e como adiantou a CIG-Ensino nun estudo. Son 123 dos 334  (un 36,8% do total) e froito dunha decisión que chegou por sorpresa a moitos destes colexios, que ven como este novo e elevado recorte dificulta o seu día a día e volve pór en perigo a calidade da súa ensinanza.
A explicación dada pola Consellería a algúns dos directores indignados polo axuste foi aínda máis sorprendente. Todos os centros que teñan aforrado máis dun 33% do seu orzamento sufrirán un maior recorte na partida de gastos de funcionamento e que será aínda máis grande canto máis presuposto tivesen aforrado. Ese é o caso do CPI Doutor Daniel Monje, de Navia de Suarna, que viu como a partida pasou dos 36.498 euros do curso pasado aos 16.486 deste 2012-13. É o premio a ser un dos centros con maior remanente, segundo lle explicou a Administración.
A Consellería recoñece "un pequeno reaxuste" nas partidas destinadas a gastos correntes e explica que os centros educativos "poderán utilizar os remanentes do 2012", cantidades que nalgúns casos "son dunha contía igual ou superior ao do propio orzamento dos centros para o 2013". "Este reaxuste, que afecta a un 30% dos centros públicos, realizouse tendo en conta a realidade e as necesidades específicas de cada centro, polo que nalgúns caso obsérvanse baixadas e noutros subidas do orzamento", explica nun comunicado.
Non están tanto de acordo os afectados. "Pensei que era  un erro na transcrición, que en lugar dun tres puxeran un un na cifra final, pero non era así", explica Dolores Vázquez, directora do centro de Navia de Suarna, que dispón agora de 20.000 euros menos para gastos de funcionamento, o que supón un descenso de case o 55%. Terá menos cartos para financiar excursións, actividades extraescolares, a calefacción, amaño de infraestruturas, material... "Este ano non teremos problemas económicos neste aspecto, pero si os haberá si nos seguen recortando; o noso problema principal é a falta de profesores porque temos catro en Primaria e seguramente para o vindeiro curso teñamos tres", quéixase a responsable.
Tan sorprendente foi o tamaño do axuste que houbo directores de centros que o pasado venres, ao recibir a comunicación da transferencia reducida desta partida, puxéronse en contacto coa Consellería de Educación para advertir do que supoñían un erro. Non era tal. O recorte foi masivo e en 21 centros superou o 20%, chegando nalgúns casos a un descenso do 55% e ata do 73% en centros como os de Navia de Suarna ou Carballeda de Valdeorras. En 42 centros o axuste supera o 15%.
Porque este novo recorte únese á ampliación do copago nos comedores escolares, á redución do profesorado ou á diminución orzamentaria da Consellería de Educación, polo que pon en serias dificultades o funcionamento diario de moitos centros. "Estamos na alta montaña lucense e só en calefacción xa se nos van 10.000 euros", insiste Dolores Vázquez, que pode "entender" un pequeno axuste, pero non que se lle recorte tanto, "precisamente a quen foi capaz de aforrar mantendo a calidade educativa e de servizos no centro". "Nin valoran nin teñen en conta o esforzo que fixemos, pero tampouco parecen ter en conta que podemos ter momentos de dificultade; aínda por riba de aforrar, recórtannos máis", insiste.
 Xa no ano 2012, a partida destinada ao gasto de funcionamento destes centros foi de 31,1 millóns de euros fronte aos 28,3 deste ano 2013. A este decrecemento do 9% respecto do ano 2012 habería que lle engadir o incremento dos prezos dos gastos que os centros teñen que facer fronte con esta partida, pois a calefacción, a luz, a auga, gastos de departamentos, material ou trasporte para actividades complementarias sufriron un notable incremento.

"Con eses cartos pagamos o mantemento dos ascensores, a calefacción, as alarmas, a caldeira, os taboleiros dixitais, un programa informático... Pero agora hai arranxos dalguha infraestrutura que se cadra non poderemos facer", asegura Teresa Berdía, directora do IES Urbano Lugrís de Malpica, que sufriu un recorte de case o 28% na partida, uns 13.000 euros menos. Ela, ao contrario que a súa compañeira de Navia, non recibiu aínda explicación ningunha por parte da Consellería. "E iso que mando carta de protesta por cada recorte que nos fan", lembra.
"É unha vergonza e claro que afecta gravemente ao funcionamento e á calidade da escola; non imos poder facer todas as actividades que desexamos", recoñece Berdía, que recorda tamén que os centros afastados das grandes áreas urbanas teñen que, por exemplo, contar coa axuda dos pais para sufragar excursións ou visitas culturais a algún museo das urbes. "Pero hai moitas familias en paro ou cobrando unha axuda mínima; o 40% dos pais sofren unha situación precaria e achegada ao limiar da pobreza, así que non lles podemos exixir que paguen estas cousas", quéixase, mentres segue esperando unha explicación por parte da Consellería.
 Ademais,  hai centros aos que aínda incrementando o número de alumnado redúceselles a partida destinada a gastos de funcionamento para este ano. A merma de cartos destinada a este concepto, tal e como explica a CIG, reduce a dotación de recursos en relación aos centros concertados. Un novo golpe ao ensino público.

A Xunta corrixe o alto cargo que anunciou o veto á comida da casa nos colexios

Pagar ou pagar. Ou non comer. Son as opcións que, segundo o secretario xeral da Consellería de Educación, Jesús Oitavén, ao alumnado que fai uso dos comedores escolares que dependen do Goberno galego. Poucos días despois de ratificar o taxazo de ata un 40% nos servizos de comedor das escolas do país o departamento que dirixe Jesús Vázquez seguiu este martes a defender con intensidade a súa medida e, ao tempo, ratificaba que as familias en apuros económicos non terían máis remedio que botar a man ao peto se queren que os seus fillos e fillas sigan a xantar na escola, porque a Xunta non lles permitiría levar a comida da casa. A prohibición estivo vixente o tempo que a Consellería tardou en corrixir o seu alto cargo.
 Despois de que nos últimos meses autonomías como a Comunidad de Madrid sementasen a polémica por valorar cobrarlles tamén polo comedor aos estudantes que achegasen o popular tupper Oitavén asegurou no Parlamento "non saber como fan as outras comunidades" pero na Xunta, di, "non somos quen de garantir o cumprimento" dos principios de "seguridade alimentaria" das comidas "elaboradas no fogar". As verbas do alto cargo deron lugar a un fenomenal rebumbio social e mediático que provocou a rectificación. Fontes de Educación consultadas por este diario admiten que "non hai ningunha novidade", xa que a presenza das friameiras nas escolas "non está prevista, pero non hai ningunha prohibición".  Outra cousa, din, é que atenderán ás cuestións de "seguridade alimentaria" porque "cada pai utiliza os criterios de hixiene que lle parece", aínda que "procuren a maior limpeza", matizan. Por isto, "se se formula algún caso, haberá que estudalo", conclúen.
Con esta aclaración o Executivo emenda a Oitavén, que explicou ante os parlamentarios que "na actualidade nos centros a comida que se serve é a dos propios centros, sen que se permita comida levada da casa" e así a Administración educativa vela "pola análise, trazabilidade e principio de cautela" no conxunto dos comedores. De agora en diante, di, o alto cargo de Educación, a Consellería seguirá a vixiar que os xantares escolares teñan "todas as garantías" e, polo tanto, "non contempla" que os alumnos poidan consumir outra comida. O que non aclaraba é que acontecerá se algún alumno ou alumna non pode xantar por falta de cartos e non ten outra opción, caso por exemplo dos estudantes do rural que fan uso do comedor porque acoden ao colexio tras un longo percorrido en transporte escolar, que ata agora comían de balde na escola por acudir a ela en autobús.

Seguen as críticas

Educación segue adiante en solitario coa súa polémica reforma mentres lle choven as críticas dos sindicatos educativos, das asociacións de pais e nais e, este martes, e novo dende a oposición parlamentaria. En resposta á comparecencia de Oitavén o voceiro socialista en materia educativa, Vicente Docasar, censurou que nos comedores escolares o alumnado vaia estar de agora en diante "catalogado en función da renda". "Obrigan os nenos a entrar nos centros públicos coa declaración da renda dos pais nos dentes", ilustra o parlamentario do PSdeG, para quen a medida non é máis que "un novo castigo" de Feijóo á educación pública "coa escusa de cadrar as contas". "Fixo o mesmo retirando os libros de texto de balde", lembra.
Tamén o voceiro de AGE no debate, Ramón Vázquez se amosa convencido de que "a finalidade do PP non é outra que afixiar o sistema educativo, tal e como demostran todas as medidas que están a adoptar". A suba dos comedores, igual que as medidas a respecto dos concertos educativos só pretenden, para Alternativa, "que lle saia gratis o colexio privado a uns cantos mentres para os outros queda unha escola deficitaria, masificada ou despoboada segundo o caso, sen recursos e deteriorada". 
Pola banda do BNG o seu voceiro parlamentario, Francisco Jorquera, censura o recorte e tamén que o propio presidente "pretenda xustificalo facendo uso da demagoxia de máis baixa estofa" ao asegurar que o Goberno non pagará os comedores "cos cartso dos parados". Feijóo, di, debera saber que "a propgresividade en todo sistema minimamente equitativo e xusto hai que establecela no pagamento dos impostos, é aí onde ten que pagar máis quen máis ten". "O argumento do señor Feijóo cae pola súa propia base", asegura o nacionalista, "pero se o damos por bo teríamos que concluír que, en cambio, si están a favor de que os parados paguen os 29,3 millóns que se destinan a custear profesores de relixión" ou "os 3 millóns que se destinan a pagar aos centros concertados que segregan os alumnos" por razón de sexo.

Educación practica recortes de até o 73% nos gastos de financiamento dos centros de Secundaria

A consellaría explica que canto máis teñan aforrado maior será o recorte. CIG-Ensino alerta de que a medida "impedirá o funcionamento normal dos centros e suporá un deterioro no desenvolvemento escolar".
A consellería de Educación vén practicar un recorte na partida destinada a gastos de funcionamento dos centros de ensino de Secundaria. Após realizar un estudo dos institutos, centros de FP e centros públicos integrados, CIG-Ensino constatou que en 123 dos 334 a redución de fondos supera o 9%. Con todo, en 21 centros superou o 20% e en Carballeda de Valdeorras chegou até o 73%. Por que? Porque son os que máis diñeiro tiñan aforrado, segundo a explicación facilitada polo departamento que dirixe Jesús Vázquez.
Cando as direccións dos centros comezaron a contactar coa consellaría recibiron por resposta que aqueles que teñen un remantente superior ao 33% sufrirán un recorte maior, que será meirande a maior aforro.
Desde a central nacionalista valoran a medida como máis un paso na "cruzada" da Xunta contra o ensino público "que impedirá o funcionamento normal dos centros e suporá un deterioro no desenvolvemento escolar" e recorda que o "estrangulamento" será "aínda máis grave" este ano académico, após a tesourada de máis de 20.000 euros practicada pola Xunta o ano anterior, tamén en gastos de funcionamento.

O conselleiro foxe d@s representantes das artes escénicas, en pleno "escrache"

A segunda xornada de 'escrache' ao conselleiro tivo lugar tamén no Gaias. Á saída da presentación dunha nova exposición do museo recibiu os apupos do sector entre berros de "demisión".
A Plataforma Galega das Artes Escénicas e Musicais continuou hoxe coa presión ao conselleiro de Cultura, Xesús Vázquez, en protesta pola situación do sector e para denunciar a falta de diálogo.
Convocada polas redes sociais, membros e simpatizantes concentráronse nas instalacións da Cidade da Cultura antes da presentación aos medios de comunicación da exposición Orinoco, viaxe a un mundo perdido, a seguinte após a de Gallaecia Petrea.
"Aínda non se puxeron en contacto con nós", comentaba Salvador del Río, voceiro da Plataforma. A situación non mudou, aínda que AGADIC xa conta cun director desde o nomeamento de Jacobo Sutil. Antes de acceder ao Museo Centro Gaiás, tres membros da Plataforma de Artistas de Rúa entregaban unha carta no rexistro desta institución coa mesma petición de diálogo.
Escrache no Museo
Pouco antes da chegada do conselleiro, a Plataforma desprazouse ao interior do Museo Centro Gaiás, onde están situadas as billeteiras de entrada. Agardaron vinte minutos diante da sala de imprensa con cartóns individuis que compuñan a frase "Cultura nas cidades". Catro policías autonómicos e varios gardas de seguridade ollaban a distancia á espera da chegada de Xesús Vázquez.
O primeiro en entrar foi Anxo Lorenzo, secretario xeral de Cultura e logo sería o propio conselleiro, este último por unha porta lateral coa sorpresa d@s propi@s xornalistas que agardabamos na entrada principal.
Ao remate da conferencia de imprensa o conselleiro realizou unhas breves declaracións. Preguntado pola protesta da Plataforma sinalou a Sermos Galiza que "isto non é unha proposta de diálogo" e non quixo entrar noutras valoracións.

Pombo rexistra diversas iniciativas ao fin de paralizar o novo copago do PP contra a comida dos nenos/as galegos/as no servizo de comedores escolares

Cosme Pombo asegura que a medida afectará a moitas familias galegas

O portavoz de educación do BNG, Cosme Pombo rexistra diversas iniciativas ao fin de paralizar o “novo copago” no servizo de comedores escolares anunciado na última sesión plenaria (12-3-2013) polo conselleiro de Educación e Cultura, Jesús Vázquez. O nacionalista asegura que esta medida afectará a un gran número de familias galegas que deberán pagar este servizo que o BNG considera necesario para garantir un dereito fundamental como é o Dereito á Educación. Cosme Pombo considera que a medida incidirá nun maior deterioro do ensino público ao que hai que sumar os sucesivos recortes do Partido popular nos últimos anos.

IU lanza unha campaña a nivel nacional contra a reforma educativa. Cualifícaa de "segregadora e adoctrinadora".

Esquerda Unida puxo en marcha unha "campaña intensiva" a nivel nacional que, baixo o lema 'Lomce No', persegue a retirada do proxecto de Lei Orgánica para a Mellora da Calidade Educativa ao considerar que se trata dunha reforma "antipedagóxica, segregadora, antidemocrática, adoctrinadora e mercantilista".

O obxectivo desta iniciativa é, en palabras do coordinador da Área Federal de Educación de IU, Enrique Díez, "que o Goberno do PP acceda a ter un debate público, con participación de todos os sectores do ámbito escolar, sobre as necesidades reais do sistema educativo e as medidas concretas que poden mellorar a súa calidade e a súa equidade".
Por este motivo, a campaña busca "ampliar puntos de encontro, xuntar vontades con asociacións, colectivos e organizacións do mundo da educación e impulsar amplas mobilizacións para conseguir a retirada do proxecto de lei", xa que a Lomce supón "outra vertente máis da ofensiva antisocial do PP, encabezada neste caso polo ministro José Ignacio Wert,".
Díez engadiu que "os cargos públicos de Esquerda Unida presentarán mocións contra a Lomce nos concellos e parlamentos autonómicos onde ten representación" mentres que os representantes de IU nos distintos Consellos Escolares promoverán tamén pronunciamentos destes órganos "esixindo a retirada deste proxecto de lei".
Tamén se impulsarán debates sobre a Lomce e propostas alternativas desta formación en "todas as comunidades autónomas, así como a nivel provincial, municipal e nos propios centros educativos", en colaboración con organizacións e colectivos contrarios aos recortes educativos.
Segundo Díez, "IU vai buscar a máxima coordinación coas Plataformas pola Escola Pública e coa campaña 'Por unha Escola Pública e Laica. A relixión fóra da escola', con vista a impulsar manifestos conxuntos e á organización de mobilizacións unitarias nas distintas autonomías".
Tamén sinalou que IU apoiará e participará "activamente" nas iniciativas e mobilizacións dos distintos sectores da comunidade educativa contrarios á Lomce que, a xuízo da formación, supón un ataque frontal á escola pública" cuxos efectos, nun período de entre oito a dez anos, se traducirán "na privatización xeneralizada da educación, fronte a un carácter residual e asistencial do ensino público".
Por último, distribuiranse materiais de apoio, como carteis, dípticos explicativos que se enviarán e repartirán nos centros públicos e un vídeo que se difundirá nas redes sociais. Así mesmo, creouse unha web específica ('http://lomceno.wordpress.com'), unha páxina en Facebook ('http://www.facebook.com/IUEducacion') e perfil en Twitter (@IUeducacion).

Educación paraliza a nova orde de concertos mentres analiza o fallo do TSXG

A Consellería de Cultura, Educación e Ordenación Universitaria paralizará a nova orde de concertos educativos ata que a asesoría xurídica conclúa a súa análise sobre a sentenza do Tribunal Superior de Xustiza de Galicia, que afecta ás partidas concedidas a cinco centros que separan o alumnado polo seu sexo.
   Así o avanzou en declaracións aos medios o titular do departamento autonómico, Jesús Vázquez, quen reiterou que a asesoría xurídica está a "analizar en detalle" o fallo xudicial e que tomarán unha decisión cando dispoñan dun estudio "serio".
   Mentres tanto, Educación decidiu paralizar a nova orde que estaba prevista para "estes días" ata que os servizos xurídicos conclúan o seu estudio da sentenza, para despois tomar unha decisión no prazo "máis breve posible". "O que non pode ser son meses", engadiu posteriormente.
   Así mesmo, aclarou que o fallo non suporá "ningún inconvinte" para "ningún centro concertado", e reiterou que "o único" que poden facer "neste momento" é paralizar a nova orde "á vista da sentenza".

Os pais e nais da escola pública mobilizaranse contra o pago nos comedores

"Ante isto, non imos quedar calados; queren acabar coa escola pública e non o imos consentir". Así de contundente se mostra a Confapa, confederación que agrupa as asociacións de pais e nais galegas, a través da súa presidenta, Helena Gómez, que cualifica "xa non de recorte, senón de ataque" a última medida aplicada pola Consellería de Educación e que supón que un terzo do alumnado do ensino público teña que pagar por xantar no centro, e logo de que se deixase de ter en conta a distancia ao colexio para calcular o custo do servizo.

"Non imos quedar calados;  queren acabar coa escola pública e non o imos consentir", di a Confapa.

O prezo máximo fixado pola Xunta para prestar este servizo de comedor increméntase en plena crise un 40,2% a respecto do curso anterior, ao tempo que polo comedor, que ata agora eran de balde para o 91,82% do alumnado, terá que ser sufragado polo 43,26% do alumnado, segundo a propia Consellería de Educación.
A partir do vindeiro curso, unha familia con dúas persoas adultas que cobren algo máis de 1.125 euros ao mes cada unha terá que pagar uns 90 euros mensuais polo comedor escolar do seu fillo ou filla, que custará 4,50 euros ao día. Ese será o prezo máximo, mentres a Xunta sostén que se mantén a "gratuidade total" para as "rendas baixas". No entanto, as familias de entre un e dous fillos en idade escolar con renda per cápita de entre 7.000,01 e 8.000 euros ao ano, tamén terán que pagar o comedor. Un euro ao día -uns 20 euros ao mes-, o mesmo que para as familias numerosas que ingresen máis de 7000,01 euros per cápita.
"Non creo que as familias que cobren 60.000 euros ao ano leven os fillos á escola pública", advirte Helena Gómez. Mentres, a Xunta segue defendendo un sistema que considera "solidario", "progresista" e necesario para manter a "sostibilidade" dos servizos da educación pública. "Non é solidario, sentón todo o contrario", retruca a Confapa, que repara no feito de que a consellería "teña en conta a renda do ano pasado, cando a situación económica dunha familia pode cambiar dun mes para outro". "Podes ser mileurista hoxe, pero mañá estar no paro; non é só unha medida inxusta, senón que supón un ataque", insiste, tras destacar que a medida "se ceba" co rural. Porque nas cidades, son maioría os centros públicos cuxos comedores son xestionados e sufragados polas propias anpas (asociacións de nais e pais), que contratan un servizo de cátering para os seus pequenos e que, nalgúns casos, reciben unha pequena subvención "que pode supor uns 30 euros por cada familia". No entanto, non ocorre o mesmo no rural, que depende -e moito- deste servizo de comedor para os pequenos, que xa sofren recortes noutros ámbitos como no transporte. "Non imos permitir que os fillos leven un tupper a clase, moito menos aqueles cativos que teñen que camiñar 800 metros para coller un bus por culpa dos recortes", engade Gómez, que cualifica de "esperpéntica" a situación na que quedarán algunhas familias.

Ademais, insiste a presidenta da Confapa, "os nenos non deben levar a fiambreira porque deben comer nun prato, co seu garfo e o seu coitelo, porque tamén é función da escola ensinar iso". Pero iso non é o peor. "O xantar do colexio é, en moitos casos, a única comida en condicións que os pequenos fan en todo o día", asegura Helena Gómez, que alerta da "situación de miseria" que sofren moitas familias para as que as achegas da escola pública son fundamentais.
Desde a Fapacel, a federación provincial de anpas de Lugo e que agrupa moitos centros do rural, cualifican de "ofensiva á escola pública" a medida, que cren que "só vai servir para igualar os servizos da pública a concertada". "Se temos que pagar polos servizos tanto na pública como na concertada, ao final o que van conseguir é que os centros públicos se queden sen nenos e a concertada se siga a beneficiar de unhas axudas que non deberían estar a recibir", denuncia. "Por que temos que pagar uns servizos que xa estamos pagando cos nosos impostos?", pregúntanse.
A solución, para a Confapa, é clara: "retirar os concertos e, en primeiro lugar, os que marca a Xustiza" para así destinar eses cartos aos comedores. Helena Gómez refírese á última sentenza do TSXG que tomba os concertos da Xunta cos colexios que segregan por sexo. "Tan só as achegas públicas a eses cinco centros supoñen 3 millóns de euros; empecemos por aí, aínda que na federación somos partidarios de que se retiren tamén todos os demais", di con contundencia. "No Goberno din que non teñen cartos, pero para o que queren si que dispoñen deles; o que queren é desmantelar a escola pública e, de paso, están a desmantelar o rural", volve acusar.
Por todo isto, preparan xa accións de protesta e mobilizacións ante este novo "ataque" ao ensino público. "Non o imos consentir", insiste a presidenta da federación, que terá unha xuntanza directiva o vindeiro sábado onde se acordarán as medidas a tomar de aquí en diante para deter unha medida que volve precarizar a escola pública mentres se manteñen as achegas públicas aos centros privados. Mentres, e nun acto na Cidade da Cultura, o conselleiro de Eduación, Jesús Vázquez, anunciou que a Xunta vén de "paralizar a orde de concertos que estaba pendente de saír" tras a sentenza do TSXG mentres a asesoría xurídicia analiza o ditame.

Os equipos de normalización piden á Xunta que "reconsidere" a súa estratexia co galego

A Coordinadora Galega de Equipos de Normalización e Dinamización Lingüística (Cgendl), que agrupa a máis de 400 equipos e docentes, pídelle á Xunta que cumpra a lei, logo das sentenzas do TSXG que invalidan dous puntos clave do decreto do plurilingüismo, e que aplique os principios xerais da Lei de Normalización, reconsidere a súa estratexia co idioma e "deixe de fomentar preconceptos en contra da promoción social do galego".
A través dun comunicado, que será difundido "masivamente" nos centros escolares galegos, pretende "fixar a posición" dos equipos de normalización "tras as últimas declaracións realizadas nos pasados días polo presidente Feijóo a respecto da política lingüística que pretende seguir o Goberno galego".
Así, a Cgendl lembra que os usos da lingua galega no ensino non universitario "seguen rexidos polo momento polo decreto do plurilingüismo" e, xa que logo, baséanse nos dous principios invalidados pola Xustiza: a consulta ás familias e a posibilidade do alumnado de "empregar o castelán cando a materia que se imparte é en galego", pois é, aclara, nos ámbitos urbanos castelanfalantes "onde se producen as protestas dunha ínfima porcentaxe de discentes e familias por teren que aprender na lingua propia de Galicia que, supostamente, lles é descoñecida".
"A Xunta de Galicia segue teimando en realizar a consulta ás familias malia o ditado polo TSXG", recorda o comunicado, e pide que "non se menosprece a legalidade e pretenda determinar a lingua do ensino en educación infantil a través de ningunha enquisa", tal e como se fixo en cursos anteriores, xa que "non respecta o que formula o artigo 13.1 da Lei de Normalización Lingüística (LNL) nin o establecido no Plan Xeral de normalización da lingua galega (Pxnlg).
A Cgendl advirte que desde a Administración autonómica "estáselle a pedir ao profesorado 'flexibilidade' para que se lle permita ao alumnado empregar a lingua da súa preferencia, é dicir, o castelán" e recordan que "non se pode esquecer que persiste unha situación social de enorme desigualdade entre galego e castelán".
Por todo, a Coordinador pide á Xunta que "reconsidere as estratexias de promoción da nosa lingua" e que "asuma como deber inexcusable as potencialidades que posúe o sistema educativo como axente efectivo tanto para a normalización do galego como para a integración social e comunitaria". Ademais, cre necesario "aplicar os principios xerais da Lei de Normalización (LNL)", sen renunciar ao plurilingüismo, pero garantindo "que o alumnado adquira unha competencia plena en galego ao rematar o ensino obrigatorio".Do mesmo xeito, pide ao Goberno autonómico "e aos seus portavoces" que "deixen de fomentar preconceptos en contra da promoción social do galego", xa que "deben actuar con enorme responsabilidade e altura política nun momento moi crítico para a transmisión interxeracional da nosa lingua". Así, reclaman tamén que as autoridades educativas "fomenten sen complexos" a presenza do idioma en calquera materia, nomeadamente nas científicas e tecnolóxicas e que lles permitan "adoptar aos centros aquelas medidas normalizadoras que se adapten ao seu contexto e impliquen, na medida do posible, a toda a comunidade".

Concertos con colexios que segregan: valen por 650.000 menús escolares

Os cálculos dos sindicatos educativos e dos grupos da oposición coinciden en que, atendendo aos orzamentos autonómicos e á orde de concertos de 2009, as achegas de fondos públicos aos colexios que separan os nenos das nenas, agora declaradas ilegais polo Tribunal Superior de Xustiza de Galicia (TSXG), viñeron supoñendo uns 3 millóns de euros anuais. A Consellería de Educación, ao anunciar a suba de ata un 40% nas taxas dos comedores escolares, fixou un prezo máximo de 4,50 euros por estudante e día, o cal ten que ser abonado polo alumnado en cuxas familias os ingresos per cápita sexan superiores a 9.000 euros anuais.
Cando menos ata que a nova reforma educativa do Goberno central -a coñecida como Lei Wert- entre en vigor, o Goberno galego vai ter prohibido manter prazas concertadas nos cinco colexios segregacionistas aos que subvencionaba: Las Acacias, Montecastelo e Aloya, en Vigo, e Montespiño e Peñarredonda, na Coruña. Quedan, polo tanto, tres millóns de euros liberados ao ano que, a xuízo dos grupos parlamentarios diferentes do PP, poderían ser dedicados aos comedores escolares e así eliminar ou paliar o incremento que vén de decidir o departamento que dirixe Jesús Vázquez. Que solucionaría isto?
Segundo o propio Goberno galego os 4,50 euros do menú escolar non son un prezo aleatorio, senón que é "o custo do servizo", en verbas do secretario xeral de Educación, Jesús Oitavén. Isto quere dicir, polo tanto, que no curso 2016-17, cando a Consellería conta con acadar o "fito" de atender 66.805 nenos e nenas nos seus comedores, o custo real do servizo sería de 300.622,50 euros ao día. Polo tanto, nunha hipotética situación na que todo o alumnado pagase ese prezo "real", os cartos dos colexios segregacionistas poderían sufragar apenas dez días de comedor.
Pero, se o cálculo é realizado non por días sobre o global do alumnado, senón por menús pagos, o dato pode ser aínda máis ilustrativo. No caso de que eses 3 millóns de euros anuais fosen destinados a pagar comedores escolares, darían para abonar o custo de máis de 650.000 menús, concretamente, de 666.666. Para que esta hipótese fose real Educación tería que realizar unha modificación orzamentaria, segundo a cal os cartos dos centros segregacionistas fosen sumados aos 27,8 millóns de euros que figuran nas contas públicas de 2013. 
Non obstante, non semella moi factible que a Xunta decida reorientar a súa suba de prezos, toda vez que o propio conselleiro non só considera que a medida é adoptada porque "non había máis de onde sacar". Ademais, segundo o máximo responsable da administración educativa galega, "o novo modelo de comedor é unha medida moi progresista".

Tarifas dos comedores escolares da Xunta

Prezo por alumna/o	Fillas/os en idade escolar	Ingresos anuais per cápita
De balde	Indiferente	Menos de 7.000€
1€/día	1 ou 2	7.000,01€ - 8.000€
1€/día	3 ou máis	Máis de 7.000,01€
2,50€/día	1 ou 2	8.000,01€-9.000€
4,50€/día	1 ou 2	Máis de 9.000,01

 

Os deputados, Cosme Pombo e Carme Adán reclaman a devolución dos cartos dos concertos durante catro anos »

Os deputados do BNG, Carme Adán e Cosme Pombo piden, a través dunha iniciativa parlamentaria que, o Goberno galego “acate de inmediato a sentenza” do Tribunal Superior de Xustiza de Galiza que anula os concertos cos centros que segregan ao alumnado.

Para os deputados do BNG “a igualdade” é un principio básico que debe rexer toda a acción educativa e así está recollido no artigo 84.3 da LOE no capítulo que regula a escolarización en centros públicos e privados concertados cando afirma: “En ningún caso haberá discriminación por razón de nacemento, raza, sexo, relixión, opinión ou calquera outra condición ou circunstancia persoal ou social”. Os deputados do BNG lembran que, o PP en Galiza na pasada lexislatura desoíu a LOE e mantivo os concertos educativos que vulneraban a igualdade entre nenos e nenas. Apoio económico público do PP á segregación no ensino. O PP a través do anteproxecto da LOMCE pretende levar adiante unha contrarreforma educativa que aspira a normalizar o desvío de fondos públicos a centros privados que segregan e discriminan ao alumnado en función do sexo”, manifestan. Os parlamentarios nacionalistas afirman que “a igualdade é un dereito fundamental que permite a realización dos ideais de liberdade e vida democrática” e instaurar, a través da educación a segregación en función do xénero é “regresar ao pasado” e rachar cos principios educativos básicos construídos nos últimos trinta anos como garantía dunha maior xustiza social e igualdade de oportunidades. Os centros deben devolver os cartos públicos recibidos durante catro anos. O BNG congratulase da sentenza do Tribunal Superior de Xustiza de Galiza pola que son anulados os concertos que a consellaría de Educación mantiña con cinco colexios relixiosos que segregan o alumnado por razóns de sexo: Colexios -Monte Castelao, Las Acacias e Aloia en Vigo; e Montespiño e Peñarronda na Coruña- aos que destina até tres millóns de euros ao ano en virtude dos concertos co ensino privado. Adán e Pombo preguntan ao Goberno galego polas actuacións previstas para acatar de inmediato a sentenza do TSXG e que os centros devolvan os cartos públicos que recibiron mentres practicaban unha educación sexista cos orzamentos de todos os galegos e galegas.